Sonte Andorra-Shqipëria, nis ëndrra kuqezi

Shpërndaje

E nisim më Andorrën, kundërshtaren ideale për të marrë tri pikët e para në Grupin I kualifikues të “Katar 2022”, por kujdes, kujtesa e afërt “në tërheq veshin”.

Më 14 nëntor 2019, në “Elbasan Arena”, përfaqësuesja modeste europiane u mori pikë kuqezinjve me një barazim zhgënjyes 2-2. Ishte ndeshja e shtatë e Edy Rejas në stolin e Shqipërisë e sigurisht, ky barazim zhgënjeu ndoshta më shumë se humbjet me Islandën, Francën dhe Turqinë.

Në drejtimin e teknikut 74-vjeçar italian, “shqiponjat kuqezi” përmbyllen me sukses, pas shumë dyshimesh gjatë rrugës, ndeshjet e Nationas Ligue, duke fituar vendin e parë në grup e rrjedhimisht ngjitjen në Ligën B.

Në kampin kuqezi duan patjetër të “lajnë mëkatin” e atij barazimi me Andorrën, që la shije të keqe jo thjesht për rezultatin, por për qasjen që patën futbollistët në fushën e blertë.

Tani nis një rrugëtim i ri, nga Andorra modeste, në kualifikueset e botërorit, ku objektivi minimal është vendi i tretë në grup (do të linim pas një kundërshtar më të fortë, me shumë mundësi Hungarinë).

Nuk lejohet asnjë gabim në një ndeshje që duhet luajtur me nerva çeliku dhe tempizmin e duhur, që në ndeshjen me Anglinë të shkohet me moral dhe pritshmëri të larta.

Reja nuk sheh arsye për të eksperimentuar, sikurse theksoi në konferencën për shtyp, do të aktivizojë lojtarët më të mirë dhe më në formë. 

Lojtarët kuqezi kanë patur minutat e nevojshme në skuadrat respektive, madje shumë prej tyre kanë qenë protagonistë absolutë.


Shpërndaje

Leave a Reply

Your email address will not be published. Required fields are marked *

Translate »